Forsetahjónin sáu Íslendinga leggja Pólverja

Ólafur Ragnar Grímsson, forseti Íslands, og Dorrit Moussaieff forsetafrú komu í nótt að íslenskum tíma til Beijing til að vera viðstödd lokadaga og lokaathöfn Ólympíuleikanna.

Fram kemur í tilkynningu forsetaembættisins að hjónin hafi horft á Íslendinga leggja Pólverja í átta liða úrslitum handknattleikskeppni Ólympíuleikanna. Munu þaufylgjast með öðrum leikjum í handbolta og ýmsum öðrum keppnisgreinum, heimsækja Ólympíuþorpið og hitta alla íslensku þátttakendurna.

Þá mun Ólafur Ragnar funda með Hu Jintao, forseta Kína, að ósk hins síðarnefnda og fer sá fundur fram á föstudagsmorgun að kínverskum tíma. Eftir dvöl sína í Kína fer forsetinn til Bangladess þar sem hann situr ráðstefnu um loftslagsbreytingar og fæðuöryggi.

„Margar þjóðir í Asíu óttast nú afleiðingarnar af þeirri hækkun sjávarborðs sem bráðnun jökla og íss á norðurslóðum - á Grænlandi, Norðurskautinu og Íslandi - mun hafa í för með sér ef ekki tekst að koma í veg fyrir alvarlegar loftslagsbreytingar," segir í tilkynningu forsetaembættisins.