Frjálslyndar konur vilja að forseti beiti synjunarvaldinu

Konur í Frjálslynda flokknum skora á herra Ólaf Ragnar Grímsson, forseta Íslands, að neita að undirrita frumvarp um breytingu á lögum um tekjuskatt. Í tilkynningu frá frjálslyndum konum segja þær að meirihluti Alþingis hafi gefið eftir skatta vegna söluhagnaðar lögaðila með afturvirkum hætti. Með því að neita að staðfesta lögin gefist þjóðinni tækifæri til að kjósa um frambúðargildi þeirra.

Frjálslyndar konur segja að lagabreytingin brjóti í bága við almennu jafnræðisregluna í stjórnarskrá lýðveldisins þar sem felldir séu niður skattar fyrir ákveðinn hóp auðmanna. Slík niðurfelling sé fordæmislaus í sögu islensku þjóðarinnar. Forsetinn hafi áður neitað að staðfesta meirihlutavilja þingsins og svarið eið að virða stjórnarskrá lýðveldisins. Forsetanum beri að virða stjórnarskrána og vilja þjóðarinnar og ganga í berhögg við gerræðisleg vinnubrögð ríkisstjórnarinnar.