Bílstjórinn bjargaði því sem bjargað varð

Bílstjórinn í rútunni sem lenti í hörðum árekstri við jeppa á Suðurlandsvegi brást hárrétt við og forðaði frekara slysi. Þetta segir Sigríður Ásta Hallgrímsdóttir, starfsmannastjóri Kynnisferða, félagsins sem á rútuna. „Hann bjargaði því sem bjargað varð enda er þarna mjög vanur maður á ferð," segir Sigríður.

Rúmlega þrjátíu manns voru í rútunni, bæði erlendir ferðamenn og Íslendingar, en hún var á leið í Skaftafell. Bílstjórinn mun hafa komið í veg fyrir að rútan hafnaði ofan í skurði sem var skammt frá vettvangi. Fimm í rútunni voru fluttir á slysadeild til aðhlynningar, bílstjórinn og bílþjónn ásamt þremur farþegum. Bílþjónninn mun hafa skorist þegar hann fékk glerbrot í hálsinn.

Sigríður bendir á að allir farþegar hafi verið í beltum enda sé merki í hverri einustu rúðu í rútunni um að fólki beri að vera með þau. Sigríður segir aðspurð að það hafi örugglega haft mikið að segja um að ekki fór verr.

Í tilkynningu frá Rauða krossi Íslands segir að flestir farþegarnir hafi verið fluttir í höfuðstöðvar samtakanna í Efstaleiti þar sem þeir fengu áfallahjálp. Hafði Rauði krossinn útvegað túlka á ítölsku, portúgölsku, þýsku og ensku til að aðstoða ferðafólkið og hlúa að því. Þá kom bílstjórinn og heilsaði upp á fólkið eftir að hann hafði farið í skoðun á slysadeild. Rauði krossinn segir marga hafa verið slegna vegna slyssins en að allir hafi haldið ró sinni.

Agnar Daníelsson, rekstrarstjóri Kynnisferða, segir að við öll óhöpp fari í gang ákveðið verkferli sem fylgt hafi verið að þessu sinni. Hann segir flesta ferðamennina hafa farið til Reykjavíkur og þegið áfallahjálp hjá Rauða krossinum.

Tildrög slyssins voru að ökumaður jeppa, sem ók í átt að Hveragerði, hugðist beygja til vinstri inn á Kirkjuferjuveg og hafði nánast numið staðar til að bíða eftir rútu sem kom á móti. Þá bar að lítinn sendibíl, sem ók aftan á jeppann, sem kastaðist við það framan á rútuna og höfnuðu rútan og jeppinn utan vegar. Einum er haldið sofandi á gjörgæsludeild eftir slysið.