Gunnar Páll: Ekkert athugavert

Gunnar Páll Pálsson formaður VR nýtur trausts meðal trúnaðarmanna félagsins til að sitja áfram sem formaður félagsins. Hann sér ekkert athugavert við að hann sem verkalýðsforingi - með laun sem slaga upp í laun forseta Íslands - berjist gegn ofurlaunum í samfélaginu.

Spjótin hafa staðið á formanni VR undanfarna daga eftir að í ljós kom að hann samþykkti hinn umdeilda gjörning stjórnar gamla Kaupþings - að fella niður persónulegar ábyrgðir á lánum sem starfsmenn tóku til að kaupa hlut í bönkunum. Búið er að draga þann gjörning til baka. Nokkrir söfnuðust fyrir utan VR húsið í dag til að mótmæla.

Á sama tíma mættu trúnaðarmenn félagsins á fund til að hlusta á útskýringar formannsins.

Fundarmenn vildu ekkert tjá sig eftir fundinn heldur vísuðu í ályktun hans þar sem trúnaðarmenn fallast á að formaðurinn hafi verið að verja hagsmuni lífeyrissjóðsfélaga með þessu.

Gunnar Páll var með um 550 þúsund krónur á mánuði fyrir að sitja fáeina fundi fyrir VR hjá Kaupþingi. En er trúverðugt að verkalýðsforingi eins og hann - sem var með um 1700 þúsund í mánaðarlaun - berjist t.d. gegn ofurlaunum í samfélaginu?

Það er betra segir Gunnar Páll að stéttarfélög og lífeyrissjóðir hafi bein áhrif á aðgerðir og ofurlaun einkafyrirtækja, eins og Kaupþings, en að hneykslast á þeim á kaffistofum. Ekki var þó á honum að skilja að hann myndi sækjast eftir svo beinum áhrifum á næstunni.

,,Ég mun hugsa mig verulega um það áður en ég geri það aftur," sagði Gunnar aðspurður hvort hann muni sækjast eftir því að taka sæti í stjórnum hlutafélaga á nýjan leik.