Sat fund NATO-ráðherra um átök Rússa og Georgíumanna

Ingibjörg Sólrún Gísladóttir utanríkisráðherra sat í dag sérstakan aukafund utanríkisráðherra Atlantshafsbandalagsins í Brussel þar sem fjallað var um ástand mála í Georgíu og viðbrögð bandalagsins við hernaðaraðgerðum Rússa í landinu.

Fram kemur í tilkynningu utanríkisráðuneytisins að ráðherrarnir hafi samþykkt yfirlýsingu þar sem lýst er yfir fullum stuðningi við vopnahléssamkomulagið sem forsetar Georgíu og Rússlands undirrituðu fyrir tilstuðlan formennsku Frakka í Evrópusambandinu, Öryggis- og samvinnustofnunar Evrópu og Bandaríkjanna.

Þá ítrekuðu ráðherrarnir að sjálfstæði og landamæri Georgíu yrði að fullu virt og hörmuðu fall óbreyttra borgara. Í yfirlýsingunni er átökunum í Suður-Ossetíu lýst sem ógn við svæðisbundið öryggi og eru Rússar hvattir til að standa við gefin loforð og kalla herlið sitt frá Georgíu nú þegar og tryggja að neyðaraðstoð komist til skila án tafar.

Þá átaldi bandalagið Rússland fyrir að beita óhóflegu vopnavaldi og áréttaði mikilvægi þess að rússnesk stjórnvöld virtu þau gildi sem ríkja í samskiptum Rússlands og NATO," segir einnig í tilkynningu utanríkisráðuneytisins.