Sala áskriftarkorta í Borgarleikhúsinu sjöfaldast

Áskriftarkort Borgarleikhússins hafa rokið út undanfarið og nú hafa um fjögur þúsund manns tryggt sér kort fyrir veturinn. Þetta er sjöfaldur sá fjöldi sem keypti áskriftarkort í fyrra, og munu vera fleiri áskriftarkort en nokkurt íslenskt leikhús hefur selt á einu starfsári. Og það þrátt fyrir að enn séu þrjár vikur eftir af kortasölu leikársins.

Sala á einstakar sýningar hefur auk þess gengið með eindæmum vel í Borgarleikhúsinu að því er fram kemur í tilkynningu. Gríðarleg aðsókn hefur verið á Fló á skinni þar sem uppseldar sýningar eru þegar orðnar 35. Þá er þegar uppselt á 11 sýningar á nýjum söngleik Ólafs Hauks Símonarsonar , Fólkið í blokkinni, sem frumsýndur verður á Stóra sviðinu í næstu viku.