Farandsali handtekinn

Lögreglan á Vestfjörðum handtók síðast liðið þriðjudagskvöld farandsölumann á Ísafirði sem hafði verið á ferð í byggðarlögum á norðanverðum Vestfjörðum og líklega víðar um land.

Maðurinn hafði gengið í hús og boðið til sölu olíumálverk og annan varning.  Maðurinn er af erlendu þjóðerni og hefur hvorki dvalar- né atvinnuleyfi hérlendis. Hann er grunaður um að hafa flutt varninginn ólöglega til landsins og skorti hann jafnframt nauðsynleg leyfi til sölumennskunnar. 

Talið er að atferli mannsins sé meðal annars brot á tollalögum, lögum um atvinnuréttindi útlendinga, lögum um verslunaratvinnu og lögreglusamþykkt Ísafjarðarbæjar.

Maðurinn gisti fangageymslur á Ísafirði á meðan mál hans var rannsakað og síðast liðinn miðvikudag ákvarðaði Héraðsdómur Vestfjarða að maðurinn skyldi vera í farbanni til 21. júlí samkvæmt beiðni lögreglustjórans á Vestfjörðum.

Lagt hefur verið hald á 905 myndir og muni sem tilheyra manninum auk nokkurs af fjármunum.  Rannsókn málsins er lokið og hefur lögreglustjóri þegar gefið  út ákæru á hendur manninum fyrir ofangreind brot.  Maðurinn er frjáls ferða sinna.