Ungir jafnaðarmenn vilja fresta frumvarpi heilbrigðisráðherra um sjúkratryggingar

Ungir jafnaðarmen undrast að þingflokkur Samfylkingarinnar ætli að stuðla að því að frumvarp heilbrigðisráðherra um sjúkratryggingar verði samþykkt óbreytt á yfirstandandi þingi.

Í ályktun Ungra jafnaðarmanna segir að frumvarpið geri ráð fyrir að hægt verði að fela einkaaðilum rekstur heilbrigðisþjónustu án þess að tryggt verði að þær reglur sem gildi um opinbera þjónustu, og eigi að miða að því að vernda réttaröryggi borgaranna, verði látnar gilda áfram. Þetta þýði að grunnreglur stjórnsýsluréttarins, svo sem jafnræðisreglan, meðalhófsreglan, lögmætisreglan og hæfisreglur stjórnsýsluréttarins muni ekki gilda um starfsemina verði aðilum utan opinbera kerfisins falinn rekstur heilbrigðisstofnunar, eða hluta slíkrar stofnunar.

Þá geri frumvarpið ekki ráð fyrir að fyrir hendi sé eftirlitsaðili, svo sem óháð úrskurðarnefnd, sem einstaklingar geti leitað til ef þeir telji einkaaðila ekki vera að sinna skyldum sínum með eðlilegum hætti.

„Frumvarpið gengur því í grundvallaratriðum gegn stefnu Samfylkingarinnar, en kjarni þeirrar stefnu birtist í því grunnskilyrði að réttarstaða einstaklinga breytist ekki verði einkaaðilum falið að sinna þjónustu á sviði heilbrigðismála. Áratugum saman hefur ríkt sátt í samfélaginu um með hvaða hætti sinna eigi heilbrigðisþjónustu hér á landi og er með frumvarpinu verið að vega að þeirri sátt.

Ungir jafnaðarmenn skora því á þingflokk Samfylkingarinnar að afgreiða ekki málið að svo stöddu heldur láti fresta því fram á næsta þing, enda eru fordæmi fyrir slíku, nú síðast þegar þingflokkur Sjálfstæðisflokks afgreiddi ekki frumvarp umhverfisráðherra að skipulags-, mannvirkja- og brunamálalögum vegna ákvæða í frumvarpinu um landsskipulag. Með því að fresta afgreiðslu frumvarpsins verður hægt að vinna það betur með það í huga að tryggja að grundvallarréttindi einstaklinga sem þurfa á heilbrigðisþjónustu að halda verði ekki fyrir borð borin," segir í ályktun frá Ungum jafnaðarmönnum.