Vildi leggja sitt af mörkum

Inga Björg Stefánsdóttir hefur skipulagt styrktartónleika fyrir Ellu Dís Laurens. Tónleikarnir verða haldnir í kvöld og kemur fjöldi þekktra listamanna fram.

„Á dauða mínum átti ég von, en ekki að ég ætti eftir að skipuleggja tónleika í Háskólabíói," segir Inga Björg Stefánsdóttir tónmenntakennari í Mýrarhúsaskóla, sem stendur fyrir tónleikum til styrktar Ellu Dísar Laurens og fjölskyldu hennar í Háskólabíói klukkan átta í kvöld. Ella Dís fæddist heilbrigð árið 2006, en hefur þjáðst af ógreindum hörnunarsjúkdómi í rúmt ár og hefur lækniskostnaður við próf, rannsóknir og utanlandsferðir sem hún hefur þurft að ganga í gegnum verið í kringum fimmtán til sextán milljónir.

„Ég var bara ein af þeim sem fylgdist með bloggi Rögnu Erlendsdóttur, móður Ellu Dísar.

Þegar ég sá að einhver spurði hvort ekki væri hægt að halda styrktartónleika ákvað ég að hringja í Rögnu og sagðist vilja taka það að mér. Þetta áttu bara að vera litlir tónleikar í upphafi, en svo stækkaði þetta og stækkaði. Allir listamennirnir voru rosalega viljugir og gefa allir vinnu sína, auk fjölda fólks frá Töfrahellinum sem sér um tæknivinnuna." útskýrir Inga Björg, en meðal þeirra sem koma fram á tónleikunum eru Páll Óskar, Diddú, Magni, Birgitta Haukdal og Páll Rósinkrans.

Aðspurð segist hún ekki hafa þekkt til Rögnu og fjölskyldu hennar þegar hún ákvað að taka að sér tónleikahaldið.

„Ég á fimm börn sjálf og ég get ekki ímyndað mér ef eitthvað þeirra væri veikt og ég þyrfti að hafa peningaáhyggjur í ofanálag. Það eru margir í þessari aðstöðu og fyrst ég gat ekki gefið henni milljónir sá ég tækifæri til að aðstoða hana með þessu móti," segir Inga Björg og vonast til að sjá sem flesta á tónleikunum í kvöld.

„Þetta lendir á erfiðum tíma því fólk er í áfalli í kringum mann út af efnahagsástandinu, en við höfum heilsuna og höfum gott af því að hlúa að sálinni, koma og gleyma amstri dagsins og hjálpa Ellu litlu. alma@frettabladid.is