Grunaður ofbeldismaður laus úr haldi

Karlmanni, sem grunaður eru um að hafa gengið í skrokk á eiginkonu sinni þannig að lífshættulegir áverkar hlutust af, hefur verið sleppt úr haldi. Maðurinn var úrskurðaður í gæsluvarðhald um miðja síðustu viku og rann það út í dag.

Að sögn Friðriks Smára Björgvinssonar, yfirlögregluþjóns hjá lögreglunni á höfuðborgarsvæðinu, kröfðust rannsóknarhagsmunir þess ekki að hann sætti lengur varðhaldi. Aðspurður sagðist Friðrik ekki geta gefið það upp það hvort maðurinn hefði játað á sig árásina.

Talið er að árásin hafi átt sér stað á heimili hjónanna í Breiðholti á mánudag. Konan mun í kjölfarið hafa leitað á náðir vina og gist hjá þeim. Samkvæmt upplýsingum Vísis missti konan meðvitund daginn eftir og var hún þá flutt á spítala. Var hún hætt komin vegna blæðingar inn á heila en hún gekkst undir bráðaaðgerð og er ekki lengur í lífshættu.

Lögregla hefur enn ekki getað tekið skýrslu af konunni og óvíst er hvenær það verður hægt.