Ekkert annað en dónaskapur og siðleysi

„Þeir hafa byggt sér fílabeinsturn, og þvílíkan turn!" Þetta segir Pétur Guðmundsson, framkvæmdastjóri Litavers en fyrirtækið er eitt þeirra sem fékk sent bréf frá Norvik ehf. sem segir að dótturfyrirtæki þess, Byko, Elko, Húsgagnahöllin og Intersport, hafi einhliða ákveðið að lengja greiðslufrest til sinna birgja og þjónustuaðila til að auka skilvirkni á greiðslum.

Birgjar eru flestir yfir sig hneykslaðir og segir Pétur að vinnubrögðin séu fyrir neðan allar hellur og ekkert annað en dónaskapur og siðleysi. „Þetta sýnir hvernig þessi stórfyrirtæki líta á sig og hvernig þau starfa. Þeir halda að þeir geti valtað yfir alla eins og þeim þóknast. Ég hef kynnst ýmislegu en bréfið er einfaldlega punkturinn yfir i-ið," segir Pétur og nefnir einnig að Norvik neiti að borga greiðsluseðla eins og alla jafna er gert og greiði þess í stað í gegnum heimabanka til að spara nokkra aura.

Pétur segist hafa rætt við aðra birgja og allir lýsi þeir sömu skoðun og hann. Hann segir hins vegar að birgjarnir geti lítið aðhafst í málinu. „Eina sem sem ég get gert að segja það sem allir vilja segja en geta ekki gert í ljósi stöðu sinnar. Menn eru skíthræddir um að missa viðskipti sín og hafa hagsmuni sína að leiðarljósi."

Pétur er búinn að semja bréf sem hann hyggst senda til Norvik þar sem þeim verður tjáð að héðan í frá þurfi fyrirtækið að staðgreiða öll sín viðskipti við Litaver. Hann segist ekki líða svona vinnubrögð og tekur sem dæmi að fyrirtæki eins og Byko myndi aldrei taka það í mál ef viðskiptavinir þeirra myndi greiða fyrir allar vörur sextíu dögum eftir að þeir versluðu þær.