Mesta peningasóunin í enska boltanum

Liðin í ensku úrvalsdeildinni eiga það til að opna veskið upp á gátt til að næla í þá leikmenn sem þeir vilja fá. Því miður tryggir upphæðin ekki árangur eins og sagan sýnir.

Blaðamenn The Sun hafa tekið saman topp 10 lista yfir peningasóun í enska boltanum og einbeita sér að sóknarmönnunum. Ekkert pláss var fyrir leikmenn eins og Bosko Balaban, Francis Jeffers, Corrado Grabbi eða Rolando Bianchi.

1. Andriy Shevchenko (Chelsea) - 30 milljónir punda

Markaskráin er ekki sú versta en hinsvegar vöktu kaupin á þessum leikmanni gríðarlega athygli. Hann er dýrasti leikmaður í sögu fótboltans í Bretlandi. Hann er í dag óþekkjanlegur frá því að hann raðaði inn mörkum fyrir AC Milan og hefur aðeins skorað níu mörk í 49 deildarleikjum.

2. Albert Luque (Newcastle) - 10 milljónir punda

Newcastle hefur verið duglegt við að kaupa leikmenn sem valda vonbrigðum en enginn þeirra kemst nálægt Luque sem kom frá Deportivo La Coruna. Spánverjinn skoraði eitt mark í 21 leik.

3. El Hadji Diouf (Liverpool) - 10 milljónir punda

Var ausinn lofi eftir frammistöðuna á HM 2002 og Gerard Houllier sagði hann í sama flokki og Ronaldo og Ronaldinho. Átti að verða bjargvættur en sýndi lítið og stuðningsmenn Liverpool glöddust þegar hann fór.

4. Chris Sutton (Chelsea) - 10 milljónir punda

Sutton fór hreinlega á kostum með Blackburn en hjá Chelsea floppaði hann svo um munaði og var ekki einu sinni skugginn af sjálfum sér.

5. Sergei Rebrov (Tottenham) - 11 milljónir punda

Vakti gríðarlega athygli þegar hann og Shevchenko mynduðu svakalegt framherjapar hjá Dynamo Kiev. Eru báðir á þessum ágæta lista í dag!

6. Steve Marlet (Fulham) - 11,5 milljónir punda

Fulham ákvað að feta í fótspor stóru liðanna og greiddi metupphæð fyrir Marlet frá Lyon. Þeir veðjuðu á rangan hest.

7. Adrian Mutu (Chelsea) - 16 milljónir punda

Stuðningsmenn Chelsea gleyma Mutu ekki í bráð. Einn af fyrstu leikmönnunum sem Abramovich fékk. Fór síðan frá félaginu eftir kókaín-notkun.

8. Darren Bent (Tottenham) - 17 milljónir punda

Sló í gegn hjá Charlton en gat nánast ekkert á sínu fyrsta tímabili með Tottenham. Er of snemmt að dæma hann á þennan lista?

9. Djibril Cisse (Liverpool) - 14 milljónir punda

Stuðningsmenn Liverpool vildu fá næsta Fowler en fengu Cisse. Þegar hann var ekki á meiðslalistanum stóð hann samt ekki undir væntingum.

10. Jose Reyes (Arsenal) - 10,5 milljónir punda

Floppaði ekki algjörlega en stóð samt engan veginn undir væntingum. Var óþekktur á Englandi þegar Arsenal ákvað að eyða í hann.