Fyrstu heimilismennirnir boðnir velkomnir

Fyrstu heimilismennirnir voru boðnir velkomnir á deild L-1 í dag sem Grund hefur með samningi við Landaspítala tekið að sér að reka. Deildin er biðdeild fyrir aldraða þar sem áhersla er lögð á heimilisfólk með heilabilun.

Á Grund hefur um langt skeið verið rekin sérstök deild fyrir heilabilaða.

"Þetta eru ánægjuleg tímamót fyrir okkur en undanfarin misseri hafa forsvarsmenn heimilisins leitað leiða til að útvíkka starfsemi Grundar og koma þannig til móts við þá fækkun sem verður á Grund í kjölfar þess að verið er að fjölga einbýlum", segir Guðrún B. Gísladóttir forstjóri Grundar.

Undanfarnar vikur hefur starfsfólk Grundar unnið að því að undirbúa starfsemi deildarinnar en að stórum hluta verður hægt að samnýta starfsemi stoðdeilda Grundar og deildarinnar á Landakoti. Til dæmis verður eldað á Grund, þvottur þveginn í þvottahúsi heimilisins, læknisþjónusta verður veitt frá Grund, iðjuþjálfun, sjúkraþjálfun, hársnyrting og fótsnyrting.