Fyrrverandi þingmenn segjast eiga auðvelt með að finna vinnu

Sautján miðaldra og eldri þingmenn hættu á alþingi síðastliðið vor. Enginn þeirra hefur átt í vandræðum með að fá vinnu - þótt ótryggar atvinnuhorfur eftir þingmennsku séu gjarnan taldar til röksemda fyrir betri eftirlaunakjörum lýðræðislegra fulltrúa okkar við Austurvöll.

Hin umdeilda breyting á eftirlaunalögum þingmanna og ráðherra hefur meðal annars verið rökstudd með því - sem lengi hefur verið haft fyrir satt - að torsóttara sé fyrir fyrrverandi þingmenn en aðra að finna vinnu. Halldór Blöndal flutti eftirlaunafrumvarpið á sínum tíma og skrifaði fyrir skömmu:

"Dæmi eru um að þingmenn, sem komnir eru yfir miðjan aldur, hafi átt erfitt með að fá vinnu eftir átta eða tólf ára þingsetu. Þetta er eitt af þeim ákvæðum eftirlaunalaganna sem einstaka þingmenn tala öðruvísi um í einkasamtölum en í fjölmiðlum."

Til að kanna hvað hæft væri í þessu grófst fréttastofa fyrir um afdrif þeirra sautján þingmanna sem létu af þingmennsku síðastliðið vor og eru um eða yfir fimmtugt...

Anna Kristín Gunnarsdóttir er í meistaranámi í Kennaraháskólanum.

Drífa Hjartardóttir er bóndi.

Guðmundur Hallvarðsson er í fullu starfi sem formaður Sjómannadagsráðs í Reykjavík og Hafnarfirði.

Guðrún Ögmundsdóttir er verkefnisstjóri í Menntamálaráðuneytinu.

Halldór Blöndal er kominn á eftirlaunaaldur en er formaður bankaráðs

Hjálmar Árnason er framkvæmdastjóri Samgöngu- og öryggisskóla Keilis

Jóhann Ársælsson er í stjórn Íbúðalánasjóðs og starfar meðal annars sem smiður

Jón Gunnarsson rekur sitt eigið fyrirtæki

Jón Kristjánsson er á eftirlaunum

Jónína Bjartmarz er flutt til Kína þar sem hún er sjálfstætt starfandi

Margrét Frímannsdóttir er fangelsisstjóri á Litla Hrauni

Mörður Árnason er í fullu starfi fyrir Samfylkinguna

Rannveig Guðmundsdóttir er, að eigin sögn, löggiltur efitrlaunaþegi sem nýtur lífsins - en situr auk þess í ýmsum nefndum

Sigríður Anna Þórðardóttir verður sendiherra í haust en tók sér frí frá störfum fram að því

Sigurrós Þorgrímsdóttir er enn í pólitík, og er meðal annars forseti bæjarstjórnar í Kópavogi

Sólveig Pétursdóttir situr í ýmsum nefndum fyrir Sjálfstæðisflokkinn.

Enginn þessara þingmanna kveðst hafa átt í vandræðum með að finna vinnu.