Ríkisstjórnin segir NEI við ofbeldi gegn konum

Undirskriftaátakið Segjum NEI við ofbeldi gegn konum opnaði á vefsíðu í dag og undirrituðu utanríkisráðherra, samgönguráðherra og heilbrigðisráðherra áskorunina fyrir hönd ríkisstjórnarinnar. Átakið er hvatning til ríkisstjórna heims að grípa til aðgerða til að binda endi á ofbeldi gegn konum. Þetta kemur fram í tilkynningu frá UNIFEM á Íslandi.

Í nóvember fór af stað átakið Say NO to Violence against Women og í dag opnaði landsnefnd UNIFEM á Íslandi sérstaka heimasíðu tileinkaða átakinu til þess að hvetja Íslendinga til þess að ljá málefninu lið og skrifa nafn sitt undir áskorun til ríkisstjórna heims.

„Ef eitthvað skiptir máli i samfélögum heims þá er það að auka réttindi og bæta stöðu kvenna, ekki bara fyrir konur heldur samfélagið allt. Við skulum ekki gleyma því að konur eru ekki bara fórnarlömb heldur einnig gerendur í eigin lífi. Konur um allan heim taka málin í sínar hendur og þess vegna er svona átak mikilvægt því að það styður þær í því," sagði Ingibjörg Sólrún Gísladóttir utanríkisráðherra á fundinum í morgun, samkvæmt tilkynningunni, um leið og hún hvatti aðra ráðherra, þingmenn og almenning til að leggja átakinu lið.

Markmið átaksins er að fá sem flesta Íslendinga til þess að skrifa undir áskorunina og mun átakið standa yfir í 12 vikur og lýkur 6. nóvember næstkomandi. Undirskriftirnar verða þá sendar formlega til höfuðstöðva UNIFEM í New York. Heimsátakinu lýkur 25. nóvember á baráttudegi Sameinuðu þjóðanna gegn kynbundnu ofbeldi.

„Ofbeldi gegn konum er málefni sem getur ekki beðið. Að minnsta kosti ein af hverjum þremur konum er barin, þvinguð til kynlífs eða misnotuð á annan hátt einhvern tímann á lífsleiðinni. Fimmta hver kona verður fórnarlamb nauðgunar eða tilraunar til nauðgunar. Mansal, kynferðisleg áreitni, limlesting á kynfærum kvenna, morð vegna heimanmunds, heiðursmorð og útburður stúlkubarna eru hluti af sama vandamáli, þetta er allt ofbeldi gegn konum. Ekkert land, engin menning, engin kona ung eða gömul, er ónæm fyrir þessari plágu. Alltof oft er komist upp með þessa glæpi án þess að refsað sé fyrir og ofbeldismennirnir ganga lausir. " segir Regína Bjarnadóttir stjórnarformaður UNIFEM á Íslandi í tilkynningunni.

Heimasíðu átaksins er að finna hér.