Sambýlisfólk hins látna handtekið í Hamraborg

Karlmaður og kona af erlendum uppruna sem handtekin voru í gærkvöldi í tengslum við lát á sjötugum manni í Hamraborg bjuggu með manninum í íbúð hans. Konan er á fertugsaldri en karlmaðurinn er rétt undir tvítugu.

Íbúðin sem um ræðir er skrifstofuhúsnæði sem maðurinn hafði breytt í íbúð.

Þegar Vísi bar að garði í morgun sást hvernig lögregla hafði innsiglað hurð sem gengur frá íbúðinni og út í bílakjallara hússins.

Nágrannar sem Vísir ræddi við sögðu fjölmennt lið lögreglu hafa verið við íbúð mannsins í gærkvöldi eftir að lát mannsins uppgötvaðist.