Ferguson: Ronaldo spilar með United næsta vetur

Sir Alex Ferguson virðist nú hafa tekið af allan vafa með framtíð Cristiano Ronaldo hjá Manchester United. Knattspyrnustjórinn fullyrti í samtali við BBC nú rétt áðan að leikmaðurinn yrði hjá félaginu á næstu leiktíð.

Ronaldo hefur verið orðaður við Real Madrid daglega á síðustu vikum, en Ferguson virðist ætla að ljúka þeim vangaveltum með ummælum sínum nú. Hann byggir yfirlýsingu sína á fundi sem hann átti með Portúgalanum á dögunum.

"Fundurinn heppnaðist vel. Við komum báðir skoðunum okkar á framfæri. Ég get fullyrt að hann verði leikmaður Manchester United á komandi leiktíð. Það er í það minnsta skoðun okkar hjá félaginu - hann verður ekki seldur," sagði Ferguson.