Tveir handteknir á Suðurnesjum vegna fíkniefna

Lögreglan á Suðurnesjum handtók tvo menn í nótt vegna fíkniefnamisferlis. Annar þeirra var fyrst stöðvaður á bíl sínum grunaður um akstur undir áhrifum fíkniefna.

Hann var á leið heim til hins, þar sem fíkniefni fundust við húsleit. Mennirnir eru báðir í haldi vegna frekari rannsóknar málsins, en þeir hafa báðir gerst brotlegir við fíkniefnalöggjöfina áður.

Karlmaður var stöðvaður efst í Ártúnsbrekkunni í nótt eftir að lögregla hafði mælt hann á 133 kílómetra hraða þar sem hámarkshraði er 80 kílómetrar á klukkustund. Hann var því á 53 kílómetra hraða yfir leyfielgum hámarkshraða. Hann er auk þess grunaður um að hafa verið undir áhrifum áfengis.