Staðfestir gæsluvarðhald í hraðsendingarmáli

Hæstiréttur hefur staðfest gæsluvarðhaldsúrskurð yfir Tómasi Kristjánsssyni sem handtekinn var í tengslum við svokallað hraðsendingarmál. Þarf hann að sitja í gæsluvarðhaldi til til 30. maí. Hraðsendingarmálið er komið á borð Ríkissaksóknara og er búist við því að ákæra verði gefín út í málinu áður en gæsluvarðhaldið yfir Tómasi rennur út.

Tómas hefur setið í gæsluvarðhaldi frá því í janúar vegna svokallaðs hraðsendingarmáls sem snertir innflutning á tæpum fimm kílóum af amfetamíni og 600 grömmum af kókaíni.

Getur valdið hneykslun gangi maðurinn laus

Fram kemur í gæsluvarðhaldsbeiðni lögreglu að Tómas sé undir sterkum rökstuddum grun um aðild að brotinu. Hann hafi að mati lögreglu verið ótrúverðugur og reikull í framburði en ákveðið netfang hafi fundist á tólf stöðum í vinnutölvu hans auk þess sem leitt hafi verið í ljós að það netfang hafi tengst IP-tölu þeirri sem kærði muni vera skráður fyrir og að netfang hafi verið stofnað á þeirri IP-tölu. Meint aðild hans þyki mikil en hann sé talinn tengjast skipulagningu, milligöngu og móttöku fíkniefnanna og hafa gengt lykilhlutverki.

,,Hið meinta brot kærða þyki mjög alvarlegt. Með tilliti til hagsmuna almennings þyki þannig nauðsynlegt að kærði sæti áfram gæsluvarðhaldi á meðan mál hans sé til meðferðar en telja verði að ef sakborningur, sem orðið hefur uppvís að jafn alvarlegu broti og kærði, gangi laus áður en máli lýkur með dómi þá valdi það hneykslun í samfélaginu og særi réttarvitund almennings," segir einnig í beiðni lögreglu.