Vilja að lýðræðisleg niðurstaða kosninga verði virt

Alþjóðaþingmannasambandið hvetur stjórnvöld í Simbabve til þess að taka á móti svæðisbundnum þingmannasamtökum og kosningaeftirlitsmönnum ef til þess kemur að endurtaka þurfi forsetakosningar þar í landi.

Ályktun þessa efnis var samþykkt á fundi sambandsins í liðinni viku. Þá lýstu þingmenn yfir samstöðu um viðleitni þjóðarleiðtoga í samtökum 12 ríkja í suðurhluta Afríku til að leysa þá pattstöðu sem komin er upp vegna kosninganna í Simbabve.

Í yfirlýsingunni er einnig brýnt fyrir stjórnvöldum í Simbabve að aflétta strax hömlum á málfrelsi og þess krafist að þingið verði kallað saman eins fljótt og mögulegt er. Á sama tíma eru þjóðþing og stofnanir lýðræðisríkja hvattar til að halda áfram að beita áhrifum sínum þar til lýðræðisleg niðurstaða kosninganna verði virt.