Slökkvilið höfuðborgarsvæðisins var kallað að gæsluvelli við Gvendargeisla í Grafarholti um klukkan hálfsex í kvöld þar sem átta ára gömul stúlka hafði fest sig í klifurgrind.
Móðir stúlkunnar tilkynnti um atburðinn og þurftu slökkviliðsmenn að skrúfa hluta grindarinnar í sundur til að losa hana úr prísundinni. Að sögn varðstjóra slökkviliðsins varð sú litla frelsinu fegin þegar hjálpin barst. Henni varð sem betur fór ekki meint af þessari óskemmtilegu reynslu.
