Undrast framkomu gagnvart gagnrýnanda

Fulltrúar Sjálfstæðisflokksins í menningar- og ferðamálaráði Reykjavíkurborgar lýsa yfir undrun sinni á því að einn helsti leiklistargagnrýnandi landsins hafi verið tekinn af boðslista frumsýningargesta í Borgarleikhúsinu, að því er virðist vegna óánægju með skrif hans. Þetta kemur fram í bókun sem sjálfstæðismenn lögðu fram á fundi ráðsins í gær.

Sjálfstæðismenn segja að mikilvægt sé að Borgarleikhúsið, sem rekið sé fyrir skattfé Reykvíkinga, kappkosti að vera í sambandi við leiklistargagnrýnendur dagblaðanna og gæti jafnræðis gagnvart þeim varðandi aðgang að frumsýningum, jafnvel þótt stjórnendur hússins kunni að vera ósáttir við skrif einstakra manna.

Í síðustu viku svipti borgarleikhússtjóri Jón Viðar Jónsson leikhúsgagnrýnanda DV frumsýningarmiðum sínum eftir að hann skrifaði dóma um leikritin Endstation Amerika og Ræðismannsskrifstofan.