Sveitarfélög sökuð um græðgi

Borgarstjórinn í Reykjavík er, ólíkt bæjarstjóranum í Hafnarfirði, tregur að lækka fasteignaskatta en býður verkalýðshreyfingunni þess í stað upp á viðræður um húsnæðisvanda láglaunafólks. Græðgi segir formaður Starfsgreinasambandsins.

Verkalýðsforystan hamrar á sveitarfélögunum að taka hækkun fasteignaskatta til baka. Þungi fylgir kröfunni. Kristján Gunnarsson, formaður Starfsgreinasambandsins, sakar sveitarfélögin um græðgi með því að nýta sér til fulls hækkun fasteignamats til skattahækkana.

Bæjarstjórn Hafnarfjarðar er fyrst til að snúa við blaðinu en bæjarráð samþykkti í morgun þá tillögu Lúðvíks Geirssonar bæjarstjóra að taka tillögu um lækkun álagningarprósentu til afgreiðslu bæjarstjórnar. Nemur lækkunin liðlega fimm prósentum en meginþungi hennar er á íbúðarhúsnæði og er lækkunin því nokkru meiri þar að sögn bæjarstjórans. Minnihluti sjálfstæðismanna í bæjarstjórn tengir þetta ákalli verkalýðsforystunnar, og bæjarstjórinn segir það vissulega rétt, en einnig hafi hækkun fasteignamats reynst umtalsvert meiri en reiknað var með við gerð fjárhagsáætlunar. Þannig hafi verið reiknað með tíu prósenta hækkun fasteignamats en raunin hafi orðið 12 prósenta hækkun á íbúðarhúsnæði og tuttugu prósenta hækkun á atvinnuhúsnæði.

Í langstærsta sveitarfélagi landsins, Reykjavík, tekur borgarstjórinn treglega undir ósk um lækkun fasteignaskatta en útilokar slíkt þó ekki. Hann vill hins vegar skoða málið í samhengi við hvernig menn taki á vanda þeirra hópa sem verst eru settir í húsnæðismálum. Hann undrast að verkalýðshreyfingin skuli ekki hafa lagt meiri áherslu á þau mál í kröfugerð sinni og býður upp á viðræður.