Klökk yfir góðmennsku fólks

Guðleif Hallgrímsdóttir móðir Sindra Dags Garðarssonar vill koma á framfæri innilegu þakklæti til allra þeirra sem styrktu Sindra í söfnun Vísis um jólin. „Við erum bara hálf klökk yfir góðmennsku fólks og svona stuðningur gefur manni svo mikinn styrk," segir Guðlaug. Hún segir að nú geti þau keypt ýmislegt sem Sindri þarf sem ekki er greitt af tryggingastofnun.

Sindri var níu mánaða gamall þegar hann greindist með alvarlegan taugasjúkdóm og var ekki hugað líf fram yfir fjögurra ára afmælisdaginn. Hann er með þrjú æxli í heila sem ekki er hægt að skera burt og eitt þeirra þrýstir svo á sjóntaugar að Sindri er orðinn blindur.

Frá því lesendur Vísis kynntust Sindra í desember hefur heilsa hans verið þokkaleg. Á morgun fer hann í segulómun og eftir hana taka læknar ákvörðun um hvort ráðist verður í stóra aðgerð og reynt að skera burt af æxlinu sem þrýstir á sjóntaugarnar. Æxlið er orðið um 7 cm í þvermál. Ef læknar ákveða að framkvæma aðgerðina verður það gert innan örfárra vikna.