Dorrit veitir Eyrarrósina í dag

Dorrit Moussaieff forsetafrú afhendir í dag Eyrarrósina, sérstaka viðurkenningu fyrir framúrskarandi menningarverkefni á landsbyggðinni, við hátíðlega athöfn á Bessastöðum.

Þetta er í fjórða sinn sem viðurkenningin er afhent og eru þrjú verkefni tilnefnd að þessu sinni. Það eru tónlistarhátíðin Aldrei fór ég suður á Ísafirði, karlakórinn Heimir í Skagafirði og Safnasafnið á Svalbarðsströnd.

Eitt þessara verkefna hlýtur Eyrarrósina, fjárstyrk að upphæð 1,5 milljónir króna og verðlaunagrip eftir Steinunni Þórarinsdóttur. Þess má geta að Karlakórinn Heimir mætir allur og tekur lagið en í honum eru 60 karlar.