Yfir 100 þúsund flugvélar um íslenska flugstjórnarsvæðið í fyrra

Rúmlega 105 þúsund flugvélar fóru um íslenska flugstjórnarsvæðið á síðasta ári sem er tæplega átta prósenta aukning á milli ára. Það þýðir að tæplega 290 flugvélar fóru að jafnaði um flugstjórnarsvæðið á dag.

Þetta kemur fram í tilkynningu Flugstoða sem hefur nýlokið sínu fyrsta starfsári. Bent er á að þetta sé í fyrsta sinn sem fjöldi flugvéla fari yfir eitt hundrað þúsund. Um þriðjungur þeirra flugvéla sem fór um íslenska flugstjórnarsvæðið var í flugi til eða frá Íslandi.

Íslenska flugstjórnarsvæðið er um 5,4 milljónir ferkílómetrar að stærð. Það nær frá Greenwich-lengdarbaugnum í austri og vestur fyrir Grænland, frá Norðurpólnum og suður fyrir Færeyjar, langleiðina til Skotlands.

Þá segja Flugstoðir að metfjöldi farþega hafi verið í innanlandsflugi á síðasta ári, eða yfir hálf milljón. Um 47 prósent farþeganna fóru um Reykjavíkurflugvöll, 22 prósent um Akureyrarflugvöll, 16 prósent um Egilsstaðaflugvöll, 5 prósent um Ísafjarðarflugvöll og 5 prósent um Vestmannaeyjaflugvöll.