Ungur síbrotamaður slapp við refsingu

Ungur maður, sem árið 2006 var dæmdur í tveggja ára ára fangelsi fyrir mannrán og handrukkun, var í Héraðsdómi Suðurlands í dag dæmdur fyrir að hafa haft rúm tvö grömm af hassi í klefa sínum á Litla-Hrauni í sumar.

Hann var einnig dæmdur fyrir að brjóta upp hurð félagsmiðstöðvarinnar á Selfossi en hann hafði skömmu áður strokið úr vörslu fangavarða þegar hann var fluttur til tannlæknis í bænum.

Manninum, sem játaði sök í báðum tilfellum, var ekki gerð sérstök refsing vegna þessa mála. Hann er nú á reynslulausn og sækir meðferð hjá félagsráðgjafa og fíkniefnaráðgjafa.

Það mun hafa gengið vel og þykir ekki tilefni til að stefna þeim árangri í hættu með því að láta hann hefja afplánun á ný.

Þrátt fyrir að vera aðeins 19 ára hefur maðurinn hlotið meira en 10 refsidóma frá árinu 2004.