Framleiða eldsneyti úr matvælafitu og olíu

Líforka, nýtt fyrirtæki í framleiðslu eldsneytis hér á landi, hefur þróað aðferð til að endurnýta alla þá fitu og olíu sem til fellur hjá matvælaframleiðendum á Íslandi. Um er að ræða til dæmis matarolíu á matsölustöðum, hjá fiskvinnslu- og kjötiðnaðarfyrirtækjum og fitu í sláturhúsum. Þessum afurðum er annars fargað.

„Vonir okkar standa til að endurnýta alla þá fitu og olíu sem til fellur á Íslandi, bæði harða og mjúka. Það hafa verið gerðar nokkrar vel heppnaðar tilraunir við að keyra þetta á bifreiðum og nú stendur til að útvíkka það og gera kannanir í stærri skala sem taka munu til allrar lífrænnar úrgangsolíu sem fellur til á Íslandi," segir Ívar Örn Lárusson, annar eigandi fyrirtækisins, í fréttatilkynningu sem send var fjölmiðlum. Fyrirtækið er í eigu hans og Arnórs Jónssonar.

Í fréttatilkynningu frá þeim segir að helstu kostir þessa svokallaða lífdísels séu betri smureiginleikar sem gefi betri endingu véla. Þannig gangi lífdísel á óbreyttar vélar og ábyrgð bifreiðaframleiðenda haldi sér. Einnig minnki útblástur véla og þær mengi þar af leiðandi minna. ,,Þannig minnkar útblástur Íslendinga á gróðurhúsaloftegundum og með tilkomu koltvísýringskvóta mun notkun lífdísels bæta stöðu okkar til muna á bæði innlendum og erlendum vettvangi," segir Ívar.

Unnið er að arðsemismati og þróun fullburða verksmiðju til að vinna verkefnið áfram í samvinnu við Orkuveitu Reykjavíkur og Háskólann í Reykjavík, en bæði fyrirtækin hafa komið að verkefninu frá upphafi.