Verðmerkingum ábótavant hjá bakaríum

Vermerkingum í hillum og borðum var ábótavant hjá sex bakaríum og í kælum hjá þrettán bakaríum samkvæmt athugun Neytendastofa á ástandi verðmerkinga í 37 bakaríum á höfuðborgarsvæðinu dagana 19. til 24. júní.

Að þessu sinni voru brauðdeildir verslana og stórmarkaða ekki teknar fyrir. Annars vegar var ástand verðmerkinga kannað í hillum og borðum bakaríanna en hins vegar í kælum.

Verðmerkingar voru almennt í samræmi við ákvæði laga og reglna og kemur í þeim tilfellum ekki til frekari aðgerða af hálfu Neytendastofu. Vermerkingum í hillum og borðum var hins vegar ábótavant hjá sex bakaríum og í kælum hjá þrettán bakaríum.

Neytendastofa sendi skriflegar athugasemdir til þeirra bakaría þar sem verðmerkingum var ábótavant og þeim gefinn frestur til að koma verðmerkingum í samt lag. Að þeim fresti loknum verður ástand verðmerkinga kannað á ný og gripið til aðgerða telji stofnunin þess þörf.

Samkvæmt frétt frá Neytendastofu hyggst stofnunin halda verðmerkingaeftirliti sínu áfram og gera skoðun á ástandi verðmerkinga hjá fleiri verslunum.