Rússar ekki með í útboðinu á nýjum björgunarþyrlum

Rússneskir þyrluframleiðendur halda sig til hlés í útboðsferli Íslendinga og Norðmanna vegna nýrra björgunarþyrla.

Þetta skýtur skökku við í ljósi umkvartana rússneska sendiherrans fyrr á árinu. Rússneski sendiherrann lagði mikla áherslu á að rússneski þyrluframleiðandinn Kazan - sem framleiðir meðal annars Mi-172 þyrluna - fengi að taka þátt í útboði vegna þriggja nýrra björgunarþyrla Landhelgisgæslunnar.

Hann gekk svo langt að kvarta undan ókurteisi stjórnvalda af því að þau svöruðu ekki bréfum frá honum um málið.

En þegar tækifærið kom, tóku Rússar það ekki. Íslensk stjórnvöld fóru í sameiginlegt útboð með Norðmönnum. Útboðið var kynnt á flugsýningum og í fagtímaritum í vetur. Þegar frestur til að skila tilskyldum upplýsingum rann út 19. maí höfðu 22 fyrirtæki skráð sig til þátttöku - en ekkert frá Rússlandi.

Þegar Stöð tvö heimsótti Kazan þyrluframleiðandann í desember sögðust stjórnendur þar vart hafa undan að framleiða Mi-172 þyrlur fyrir markaði í Asíu, Afríku og rómönsku Ameríku. En áhugaleysi rússneska þyrluframleiðandans á norsk-íslenska útboðinu rímar hins vegar illa við áhuga rússneskra stjórnvalda á að Kazan-menn fengju að taka þátt í því.