Forsetinn hitti kollega sinn í Kína

Ólafur Ragnar Grímsson, forseti í Íslands, fundaði í morgun með kínverska kollega sínum, Hu Jintao. Í tilkynningu frá forsetaskrifstofunni segie að fundurinn hafi verið árangursríkur en Jintao þakkaði meðal annars Íslendingum auðsýnda samúð þegar jarðkjálftar riðu yfir á dögunum með skelfilegum afleiðingum.

Á fundinum var einnig greint frá því að Kínverjar hyggist leita eftir samstarfi við Íslendinga við að koma upp viðvörunarkerfi vegna jarðskjálfta sem byggir á því kerfi sem íslenskir vísindamenn hafa þróað og er í notkun hér á landi. „Forseti Íslands hafði á fyrri fundum forsetanna 2005 og 2007 vakið athygli á þessu íslenska viðvörunarkerfi og lýsti ánægju með þessa ákvörðun," segir í tilkynningunni.

Jintao minntist einnig á árangur íslenska landsliðsins í handknattleik og lýsti yfir áhuga á að efla enn frekar samstarf þjóðanna á sviði íþrótta.

Auk forseta Íslands sátu fundinn Gunnar Snorri Gunnarsson sendiherra, Örnólfur Thorsson forsetaritari, starfsmenn sendiráðs Íslands, Ólafur Rafnsson forseti Íþrótta- og Ólympíusambands Íslands, Líney R. Halldórsdóttir framkvæmdastjóri sambandsins og Magnús Bjarnason formaður Viðskiptaráðs Íslands og Kína.

Auk Hu Jintao forseta Kína og Yang Jiechi utanríkisráðherra sátu fundinn nokkrir af æðstu ráðamönnum Kína.

Tilkynninguna má í heild sinni lesa hér.