Olíuverðið komið vel yfir þolmörk útgerðarinnar

Stöðugar hækkanir á heimsmarkaðsverði olíu eru farnar að koma verulega illa við útgerðina í landinu. Sveinn Hjörtur Hjartarson hagfræðingur LÍÚ segir að verðið nú sé komið langt yfir þolmörk útgerðarinnar.

Heimsmarkaðsverð á olíutunnunni fór yfir 110 dollara í gær. "Þetta þýðir að gasolíutonnið er nú komið í tæpa 1.000 dollara," segir Sveinn Hjörtur í samtali við Vísi. "Það þýðir að olíukostnaðurinn er kominn í um 20% en í eðlilegu árferði hefur hann legið á bilinu 7-8%."

Sveinn Hjörtur segir að nokkuð vegi upp á móti þessum aukna kostnaði að afurðaverð hefur farið hækkandi jafnframt því að gengisþróunin frá áramótum hefur verið útgerðinni hagstæð. Einnig hafa útgerðirnar reynt að hagræða í rekstrinum eins og kostur er. "En það er ekki hægt að hagræða endalaust til að mæta þessu," segir Sveinn Hjörtur.

Aðspurður um til hvaða ráða útgerðin geti gripið nefnir Sveinn Hjörtur meðal annars nýjar og orkusparandi vélar í skipin. "Auk þess má nefna að breyta yfir í veiðarfæri sem eru ekki eins orkuþurfandi," segir Sveinn Hjörtur. "Þar má nefna að æ fleiri gera nú út á línu í staðinn fyrir troll enda útheimtir línan mun minni orku en trollin. Á móti kemur að vísu aukinn kostnaður við beitu."