Um sextíu björgunarsveitarmenn koma að leit að manni

Á bilinu 50-60 björgunarsveitarmenn koma nú að leitinni að Sigurði Gísla Bjarnasyni sem saknað hefur verið síðan í morgun.

Að sögn Jóns Inga Sigvaldasonar hjá Slysavarnafélaginu Landsbjörgu ganga björgunarsveitarmenn nú um stíga í nágrenni heimilis Sigurðar Gísla en hann sást síðast á heimili sínu í Lindahverfi í Kópavogi snemma í morgun. Jón Ingi segir að fleiri björgunarmenn verði kallaðir til á næstu klukkustundum beri leitin ekki árangur.

Fram kom í tilkynningu lögreglu að Sigurður Gísli væri alzheimer-sjúklingur og illa áttaður. Jón Ingi segir að leitin að honum sé byggð á tilteknu hegðunarmynstri slíkra sjúklinga. Tölur frá Bandaríkjunum sýni að alzheimer-sjúklingar hegði sér í langflestum tilvikum á tiltekinn hátt þegar þeir villist og út frá því hegðunarmynstri sé leitað.

Svæðisstjórn björgunarsveitanna hefur verið virkjuð vegna leitarinnar en bjögunarsveitir vinna með neyðarlínunni og lögreglu að leitinni.

Sigurður Gísli er 175 sentímetrar á hæð, um 80 kíló og frekar þunnhærður með yfirvaraskegg. Hann er klæddur í bláan bleiser-jakka með dökkbláum olnbogahlífum og í ljósum buxum og svörtum skóm. Ef einhver hefur orðið hans var er sá hinn sami beðinn um að hafa samband við lögreglu í síma 444-1100.