Heildaraflinn dróst saman um 14 prósent á milli ára

Heildarafli íslenskra skipa í nýliðnum janúarmánuði, metinn á föstu verði, var 14 prósentum minni en í janúar 2007. Þetta leiða nýjar tölur Hagstofunnar í ljós.

Aflinn nam alls rúmum 73 þúsund tonnum í mánuðinum en var nærri 82 þúsund tonn í sama mánuði í fyrra. Þannig dróst botnfiskafli saman um tæp 7.300 tonn, þar af dróst þorskaflinn saman um 6.300 tonn. Ýsuaflinn jókst aftur á móti um rúm eitt þúsund tonn miðað við janúar 2007.

Afli uppsjávartegunda nam rúmum 46.200 tonnum sem er tæpum 200 tonnum minni afli en í janúar 2007. Síldarafli jókst um nærri 16 þúsund tonn en loðnuafli dróst saman um rúm 19 þúsund tonn milli ára.