Viðræður um meirihluta í Ráðhúsinu í kvöld

Óskar Bergsson, borgarfulltrúi Framsóknarflokksins, mun hitta Hönnu Birnu Kristjánsdóttur, oddvita Sjálfstæðisflokksins, í Ráðhúsinu nú klukkan átta þar sem rætt verður um meirihlutasamstarf Framsóknarflokksins og Sjálfstæðisflokknum. Samkvæmt heimildmum Vísis hefur Óskar fundað í dag með framsóknarmönnum um stuðning við það samstarf.

Dagur B. Eggertsson sagði við fréttamann Stöðvar 2 fyrr í kvöld að Óskar Bergsson hefði haft samband við sig í dag og tilkynnt að hann hygðist fara í viðræður við Sjálfstæðisflokkinn. Bæði Dagur og Svandís Svavarsdóttir lýstu yfir vonbrigðum með ákvörðun Óskars í kvöldfréttum Sjónvarps.

Sagði Dagur að samstaða hefði verið innan minnihlutans að skrifa ekki upp á klækjastjórnmál sem sjálfstæðismenn hefðu ástundað. Taldi hann þróun mála vonda fyrir borgina og pólitíkina í heild. Sagði hann hollara fyrir sjálfstæðismenn að taka til í eigin ranni en að bjóða borgarbúum upp á þetta.

Sóley Tómasdóttir, varaborgarfulltrúi Vinstri - grænna, sagði fyrr í dag að yfirlýsing hefði legið fyrir um það í morgun að Ólafur F. Magnússon borgarstjóri segði af sér sem borgarfulltrúi og Margrét Sverrisdóttir kæmi inn til þess að mynda Tjarnarkvartettinn á ný. Óskar Bergsson hefði haft úrslitaáhrif í málinu og valið að ganga til samstarfs við Sjálfstæðisflokkinn. Jakob Frímann Magnússon, einn helsti ráðgjafi Ólafs, neitar þessu og segir Ólaf ekki hafa ætlað að hætta sem borgarfulltrúi.