Snúrufargan úr sögunni

Útrás íslenskra athafnamanna er rétt að byrja hafi einhver haldið að henni væri lokið. Íslenska hönnunarfyrirtækið Preggioni hefur sett á markað vöru sem notendur ýmiss konar tónlistarspilara taka vafalítið opnum örmum.

Fyrirbærið kallast Magneat (frb. magnít) og byggir á frekar einfaldri grunnhugmynd að sögn Daða Agnarssonar, framkvæmdastjóra Preggioni. „Kveikjan að hugmyndinni var einfaldlega sá vandræðagangur sem margir notendur tónlistarspilara með heyrnartólum lenda í með snúruna. Til dæmis á hlaupabrettinu í ræktinni og svo framvegis," segir Daði Agnarsson, framkvæmdastjóri Preggioni.

Magneat er í raun eins konar snúruskipuleggjari ef svo mætti að orði komast en þetta litla fyrirbæri má festa með segulfestingu á nánast hvaða fatnað sem er og hefur Preggioni tryggt sér einkaleyfi á gripnum um gervalla heimsbyggðina.

Daði segir gripinn halda á heyrnartólasnúrunni en auk þess geti notandinn stytt hana í ákjósanlega lengd svo hún þvælist ekki fyrir á ögurstundu eins og margir líkamsræktarunnendur kannist án efa við. „Hátækni sér um dreifinguna á þessu fyrir okkur hér heima og í Færeyjum en auk þess höfum við nýlega náð samningum við fyrirtæki úti sem sér um dreifinguna í Austurríki og Þýskalandi," segir hann enn fremur og bætir því við að sókn á markaði á Englandi, Spáni, Írlandi og í Benelúx-löndunum fylgi svo í kjölfarið.

Daði gerir ráð fyrir að markaðurinn taki Magneat opnum örmum enda hafi yfir 700 milljónir tónlistartækja sem á einhvern hátt styðjast við heyrnartól selst í heiminum í fyrra og gert sé ráð fyrir aukningu á þessu ári.

Tónlistarunnendur þurfa því ekki að kvíða óviðráðanlegu snúrufargani með tilheyrandi amstri í framtíðinni þegar Magneat mun hanga í hvers manns barmi og sjá um að temja leiðslurnar sem reynst hafa mörgum hvimleiðar. Kostnaðurinn ætti ekki að steypa neinum í gjaldþrot, fyrir Magneat greiðist rétt rúmlega andvirði tveggja sígarettupakka. Sumum gæti því reynst þessi nýjung hvort tveggja, áskorun um að hætta að reykja og drífa sig með iPod-spilarann í ræktina.

Áhugasamir geta lesið sér frekar til um Magneat hér.