Borgarstjórarnir saman í laxi

Árleg veiðiferð borgarfulltrúa í Reykjavík var farin í dag í Elliðaá. Reykvíkingar hafa haft þrjá borgarstjóra á kjörtímabilinu og eru þeir allir samankomnir í Elliðaárdalnum.

Ólafur F. Magnússon, Vilhjálmur Þ. Vilhjálmsson og Dagur B. Eggertsson hafa staðið við bakkann frá því klukkan sjö í morgun.

,,Dagur hefur ekki náð neinum en hann hyggur á veiði," sagði Vilhjálmur í samtali við Vísi. Sjálfur hefur Vilhjálmur líkt og Ólafur komið tveimur fiskum á land.

,,Við borgarfulltrúarnir höfum gert þetta til fjölda ára og ég býst við að fleiri borgarfulltrúar mæti síðar í dag," sagði Vilhjálmur og bætti við að veðrið væri frábært. ,,Elliðaárnar eru perla Reykjavíkur."