Ekki hlutverk lífeyrissjóða að vera í viðskiptapólitík

Það er ekki hlutverk lífeyrissjóða að vera í viðskiptapólitík, segir Gunnar Sigurðsson, forstjóri Baugs Group. Hann setur spurningarmerki við fjárfestingastefnu Lífeyrissjóðs verslunarmanna, sem hann segir hafa fjárfest vel í samkeppnisfyrirtækjum Baugs.

Hvatning Starfsgreinasambandsins til lífeyrissjóðanna um að setja sér siðareglur í fjárfestingum, t.d. að hætta norska olíusjóðsins, fékk óvæntan snúning í gær þegar stjórnarformaður Lífeyrissjóðs verslunarmanna, Gunnar Páll Pálsson, sagði það örðugt á litla Íslandi þar sem mikill þrýstingur væri frá stórum fjárfestum á að Lífeyrissjóðurinn hagaði fjárfestingum að þeirra óskum - ella hefðu þeir verra af. Hann vísaði meðal annars til Baugs en þess er skemmst að minnast þegar fregnir bárust af því fyrir hálfu öðru ári að Baugur hefðu í hyggju að stofna lífeyrissjóð fyrir sína starfsmenn - sem flestir hverjir greiða í Lífeyrissjóð verslunarmanna.

Forsvarsmenn Baugs vildu ekki tjá sig í viðtali þegar fréttastofa leitaði eftir því í dag en Gunnar Sigurðsson forstjóri Baugs sagði hins vegar í símtali frá London að ekki væri óeðlilegt að spyrja hvernig á því stæði að sjóðurinn hefði t.d. fjárfest duglega í Kaupþingi, Símanum og Exista - sem væru í samkeppni við Glitni, Vodafone og FL Group þar sem Baugur á stóra hluti - í ljósi þess að ávöxtun fjár í þessum félögum væri sambærileg. Því velti menn fyrir sér hvort önnur sjónarmið vektu fyrir sjóðnum - en þau að hafa hagsmuni sinna sjóðsfélaga að leiðarljósi.

Aðspurður hvað liði stofnun fyrirtækjalífeyrissjóðs Baugs sagði Gunnar að þær hugmyndir hefðu einungis verið ræddar og fljótlega verið slegnar út af borðinu.