Brenndist í andliti eftir flugeldafikt

Fimmtán ára piltur brenndist í andliti er hann bar eld að púðri sem hann hafði tekið úr flugeldum.

Óhappið átti sér stað í Hafnarfirði um helgina en pilturinn kom púðrinu fyrir í dós og bar eld að með þeim afleiðingum að eldblossinn náði í andlit hans. Fram kemur í frétt lögreglunnar að pilturinn hafi hlotið fyrsta og annars stig bruna í andliti og brenndist einnig á hálsi og handleggjum.

Lögreglan hvetur foreldra til að fylgjast með því að börn þeirra séu ekki að rífa í sundur flugelda. Talsvert er um að heimatilbúnar sprengjur séu enn sprengdar á höfuðborgarsvæðinu og hefur orðið talsvert eignatjón af þeirra völdum.