Einar kaupir einbýlishús

Einar Bárðarson hefur fest kaup á einbýlishús á stór-keflavíkursvæðinu eins og hann orðar það. Húsið er um 170 fermetrar og er staðsett í innri Njarðvík. Hannes Steindórsson fasteignasali fræga fólksins seldi Einari húsið, en keypti síðan sjálfur hús í sömu götu.

„Þetta er nú bara með minni húsum í götunni, sem er enginn Sólvallargata sko," segir Einar sem hefur búið í íbúð í Reykjanesbæ undanfarið.

„Hannes seldi mér þetta hús og fannst þetta síðan svo mikil reyfarakaup hjá mér að hann ákvað að flytja líka í götuna. Hann er auðvitað í miklu stærra húsi og hefur líka tilkynnt mér að hann eigi fleiri DVD myndir. Ég er því algjörlega að tapa fyrir Hannesi," segir Einar og hlær.

Eiginkona Einars er frá Keflavík og honum líkar vel að búa suður með sjó. „Við seldum ágætis eign á sínum tíma og fórum svo til London í smá tíma og vorum með litla íbúða hérna tímabundið. Það ílengdist síðan og við höfum verið að leita að stærra húsnæði síðan í vor. Ég er frá Selfossi þannig að mér finnst gott að vera svona í návígi við allt. Ég labba til dæmis með dóttur mína á leikskólann á morgnanna," segir Einar.

Hann bendir einnig á að það séu ekki nema fimm tímar á Akureyri og tveir og hálfur tími til London. „Og ef himinn og jörð eru að farast þá komumst við til Reykjavíkur á 25 mínútum."

Nokkuð hefur verið gert úr því í fjölmiðlum að Einar sé orðinn aðstoðarmaður Kjartans Ólafssonar þingmanns Sjálfstæðisflokksins.

„Það hefur nú verið gert nokkuð mikið úr því. En samkvæmt vef Alþingis þá er þetta þrjátíu prósent starf. Mitt aðal starf er hinsvegar verkefni sem heitir Íslendingur og snýst um að opna víkingaheima hér á Fitjum."

Aðspurður hvort ekki hafi komið bakslag í opnun víkingaheimanna í ljósi efnahagsástandsins segir Einar.

„Það stoppar mig ekkert. Nei, nei. Ég er að stýra þessu verkefni og á að sjá til þess að þetta opni í vor. Þetta snýr aðallega að markaðs- og kynningarmálum en fjármögnunin hefur að sjálfsögðu orðið erfiðari, það er ekker launungarmál. En það er allt hægt."