Deildu um hvort yfirstjórn Seðlabankans ætti að víkja

Geir H. Haarde hóf umræðu um þingsályktunartillöguna á því að benda á að Alþjóðagjaldeyrissjóðurinn hefði í gærkvöldi samþykkt að lána Íslandi 2,1 milljarða dollara á grundvelli áætlunar um efnahagsmál. Sagðist Geir hafa beitt sér fyrir því að málið yrði rætt á Alþingi með því að leggja fram þingsályktunartillöguna og hafnaði hann því fullyrðingum um leynd og pukur í tengslum við lánið.

Sagði hann samstarf við Alþjóðagjaldeyrissjóðinn hafa verið einu lausnina í þeim vanda sem við stæðum frammi fyrir og hún væri eina stofnunin sem hefði bolmagn til þess að aðstoða við að leysa vandann. Samstarf við hana yki traust á þeim skrefum sem við þyrftum að taka á næstunni

Brýnasta verkefnið að setja krónuna á flot

Geir sagði enn fremur að þrátt fyrir vandann væru undirstöður samfélagsins traustar og að áætlun ríkisstjórnarinnar í samstarfi við sjóðinn ásamt öðrum lánum myndi gera Íslandi kleift að vinna traust alþjóðafjármálakerfisins á ný. Sagði hann viljayfirlýsingu stjórnvalda gagnvart sjóðnum snúast um að endurvekja traust á íslenskum efnahag, styrkja stöðu ríkissjóðs og endurreisa bankakerfið. Brýnasta verkefnið væri að styrkja stöðu krónunnar og að hún yrði sett á flot þegar fyrsti hluti fyrirgreiðslu Alþjóðagjaldeyrissjóðsins kæmi hingað til lands.

Ráðherra sagði einnig að kostnaður ríkisins vegna endurfjármögnunar banka og Seðlabankans og vegna innistæðutrygginga í útlöndum yrði mikill en hann yrði endurheimtur að hluta með sölu eigna bankanna. Því þyrfti að sýna verulegt aðhald í ríkisfjármálum á næstu árum.

Seðlabankinn tæknilega gjaldþrota

Helgi Hjörvar svaraði ræðu forsætisráðherra og óskaði ríkisstjórninni til hamingju með að hafa siglt málinu í höfn. Hann sagði hins vegar að yfirstjórn Seðlabankans væri rúin tiltrú og trausti og þingmenn úr öllum flokkum hefðu kallað eftir því að skipt yrði um hana. Meirihluti væri fyrir því á Alþingi að fá fagmenn að yfirstjórn Seðlabankans. Kallaði hann eftir breytingum á yfirstjórninni nú þegar fela ætti Seðlabankanum þessi lán. Sagði hann Seðlabankann tæknilega gjaldþrota því hann hefði tapað um 150 milljörðum á viðskiptum með skuldabréf bankanna.

Geir H. Haarde sagði Seðlabankann ekki gjaldþrota og sagði efnahagsáætlun stjórnvalda unna í faglegu samstarfi við sérfræðinga á vegum bankans. Spurningin um yfirstjórn Seðlabankans dúkkaði upp reglulega en hún ætti ekki rétt á sér. Bankinn gerði sér grein fyrir verkefni sínu nú og fagmenn hans hefðu undirbúið að setja krónuna á flot næstu daga. Ekkert væri upp á Seðlabankann að klaga.

Þingmenn úr öllum flokkum vilja skipta um yfirstjórn

Helgi kom þá aftur í pontu og benti á þingmenn úr öllum flokkum og forystumenn stjórnmálaflokka sem hefðu talið nauðsynlegt trúverðuleikans vegna að skipta um yfirstjórn Seðlabankans. Þótt trúmennska væri dyggð mætti þó öllu ofgera.

Geir svaraði því til að trúverðugleiki væri lykilatriði, bæði innan lands og utan. Hann hefði verið að skoða viðbrögð erlendra aðila við láni IMF og þrátt fyrir okkar vandamál nytum við trausts. Sagðist hann telja að þingmenn ættu ekki að reyna að grafa undan þeim trúverðugleika, hvorki stjórnarþingmenn né stjórnarandstöðuþingmenn.

Berja hvor á öðrum með Seðlabankanum

Siv Friðleifsdóttir, þingmaður Framsóknarflokksins, spurði hvað væri hér á ferðinni og sagði ríkisstjórnarflokkana berja hvor á öðrum með Seðlabankanum. „Þetta er óstarfhæf ríkisstjórn, virðulegur forseti," sagði Siv og sagði ekki hægt að bjóða upp á þennan málflutning. „Við horfum á ríkisstjórnarflokkana berja hvorn annan í beinni útsendingu," sagði Siv og sagðist enn fremur farin að vorkenna forsætisráðherra að sitja undir þessu.