Öldungur í Kópavogi kærður fyrir kynferðislega misnotkun

75 ára gamall karlmaður úr Kópavogi hefur verið kærður til lögreglunnar fyrir að misnota stúlku kynferðislega á átta ára tímabili, frá því því að hún var tólf ára til tvítugs. Björgvin Björgvinsson, yfirmaður kynferðisbrotadeildar lögreglunnar á höfuðborgarsvæðinu, staðfesti við Vísi að málið væri til rannsóknar.

Björgvin staðfesti einnig að húsleit hefði verið framkvæmd heima hjá manninum og þar hefðu fundist gögn sem væru nú til rannsóknar.

Heimildir Vísis herma að stúlkan, sem er 21 árs í dag, hafi unnið hjá manninum á því tímabili sem meint misnotkun á að hafa átt sér stað .

"Mér finnst með ólíkindum að svona hlutir geti gengið í þennan tíma. Dóttir mín er búin að vera í meðferð í eitt ár og sem betur fer finnst mér hún vera að ná sér á strik. Ég vona að hann fái markleg málagjöld," segir faðir stúlkunnar í samtali við Vísi.

Hinn ákærði neitaði sök í samtali við Vísi og sagðist hafa ráðið sér lögfræðing til þess að leiðrétta þann misskilning sem upp hefði komið.