Minnkandi verðmunur hjá lágvöruverðsverslunum og öðrum

Verðlagseftirlit ASÍ segir að vísbendingar séu um að verðmunur á milli lágvöruverslana og annarra stórmarkaða sé að minnka og vísar þar til nýrrar könnunar á matarverði sem gerð var í gær.

Kannað var verð á 50 vörum og reyndist Bónus oftast með lægsta verð á þeim, eða í 31 skipti af 50. Fjarðarkaup og Kaskó voru næst oftast með lægsta verðið eða í 7 tilvikum. Nóatún reyndist hins vegar með hæsta verðið á 34 af 50 vörum sem skoðaðar voru en Hagkaup var næstoftast með hæsta verðið eða á 11 vörum.

Helmingsverðmunur á heilum ferskum kjúklingi

Eftir því sem fram kemur á vef ASÍ reyndist mesti verðmunur í könnuninni á kílóverði af heilum ferskum kjúklingi. Hann reyndist dýrastur í Nóatúni og Fjarðarkaupum og kostaði þar 1.070 krónur en ódýrastur í Nettó þar sem hann kostaði 525 krónur. Munurinn nemur 104 prósentum. Minnstur verðmunur reyndist hins vegar á kílóverði af forverðmerktum Skólaosti sem kostaði 1.190 krónur í Bónus, Krónunni og Fjarðarkaupum þar sem veittur er 5 prósenta afsláttur af merktu verði við kassa, en 1.253 krónur í öllum öðrum verslunum.

Stærri pakkningar ekki alltaf ódýrari

ASÍ skoðaði verð á algengum bökunarvörum fyrir jólabaksturinn og reyndist í flestum tilvikum talsverður munur á hæsta og lægsta verði þessara vara. „Sem dæmi má nefna að 42% munur var áLjóma smjörlíki sem var ódýrast kr. 147 í Bónus en dýrast kr. 209 í Nóatúni, og 74% verðmunur var á glasi af vanilludropum sem kostuðu kr. 97 í Bónus en kr. 169 í Samkaupum-Úrvali. Það verkur eftirtekt að stærri pakkningar virðast ekki alltaf skila sér í lægra einingaverði. Strásykur frá Dansukker er bæði til í 1 kg. og 2 kg. pakkningu í sumum verslunum. Í Hagkaupum, Nóatúni og Samkaupum-Úrvali er hagstæðara að kaupa tvær kílóapakkningar en eina tveggja kílóa. Það sama á við um Konsum suðusúkkulaði sem bæði er til í 200 gr. og 300 gr. pakkningum í Hagkaupum og Nóatúni. Kílóverðið á minni pakkningunni er í báðum verslunum lægra en á þeirri stærri. Þessi dæmi sýna að það getur borgað sig að skoða vel mælieiningaverð á vörum sem til eru í mörgum pakkastærðum, en upplýsingar um það eiga að vera aðgengilegar á verðmerkingu vörunnar," segir ASÍ.

ASÍ bendir enn fremur á að munur á hæsta og lægsta verði á þeim vörum í könnuninni sem einnig voru skoðaðar í sambærilegri könnun í þessum sömu verslunum í mars hefur í flestum tilvikum minnkað talsvert. Sem dæmi má nefna var munur á hæsta og lægsta verði á Fitty samlokubrauði 77 prósent í mars en er nú 32 prósent. Munur á hæsta og lægsta kílóverði á banönum var 153 prósent í mars en er nú 83 prósent.

„Þetta gefur vísbendingu um að verðmunur á milli lágvöruverðsverslana og annarra stórmarkaða sé að minnka. Þetta er einnig i samræmi við niðurstöður sem verðlagseftirlitið hefur birt undanfarið um breytingar á verði vörukörfu ASÍ sem hefur frá því í vor hækkað meira í lágvöruverðsverslunum en öðrum verslunum," segir ASÍ enn fremur.