Utanríkisráðuneytið fær falleinkunn vegna árásarinnar í Kjúklingastræti

Afgönsk stúlka og bandarísk kona létu lífið þegar þrem handsprengjum var varpað á íslendingana. Fjórir þeirra særðust sem og afganskir vegfarendur.

Hæstaréttardómararnir Guðrún Erlendsdóttir og Haraldur Henrýsson tóku að sér að vinna álitsgerð um málið fyrir utanríkisráðuneytið. Ingibjörg Sólrún Gísladóttir, utanríkisráðherra kynnti álitsgerðina í dag.

Þau fengu á sinn fund bæði þá sem lentu í árásinni og aðra sem að henni komu. Allir þessir aðilar fóru hörðum orðum um framgöngu utanríkisráðuneytisins á þessum tíma. Davíð Oddsson var þá nýlega tekinn við embætti utanríkisráðherra.

Þeim bar saman um að viðbrögð ráðuneytisins hafi ekki verið nægilega markviss og mótast af vanmætti til að ráða við atvik sem þetta. Ekkert hafi verið gert af þess hálfu til að rannsaka á eigin vegum atburðinn og tildrög hans.

Flestir sem gerðu skýrslu um málið kváðust hafa gert það að eigin frumkvæði. Ráðuneytið hafi staðið sig illa gagnvart fjölmiðlaumfjöllun og ekki gert gagnskör að því að leiðrétta augljósar missagnir sem fram komu.

Viðbrögð ráðuneytisins gagnvart þeim mönnum sem fórum heim fljótlega eftir atburðinn hafi mótast af tómlæti. Fremur hafi orðið vart við viðleitni til að hafa áhrif á hvað þeir segðu við fjölmiðla en að sjá þeim fyrir nauðsynlegri hjálp.

Framkoma við aðstandendur þegar atvikið var tilkynnt hafi verið tilviljanakennd og klaufaleg.

Þess má geta að þrír þeirra sem særðust í árásinni hafa engar bætur fengið en málarekstur þess vegna hefur tekið fjögur ár.