Íslenskir athafnarmenn í vandræðum vegna spillingarmála

Byggingaframkvæmdum á tveggja ferkílómetra landi á Spáni, sem athafnamennirnir Björgólfur Thor Björgólfsson og Róbert Wessmann keyptu fyrir 10 milljarða árið 2005, hefur verið frestað þar sem ekki hefur fengist byggingaleyfi vegna spillingarmála sem komu upp þar í landi.

Salt Properties, félag í eigu Róberts Wessmann, forstjóra Actavis, á um helming landsins, Straumur fjárfestingabanki um fimmtung og restin er í eigu Björgólfs Thors Björgólfssonar, stjórnarformanns Novators. Landið er í Murcia héraði, nálægt Alicante í suðausturhluta Spánar.

Landið keyptu þeir á 10 milljarða króna árið 2005 og var fyrirhugað að reisa þar 3200 einingar, þar af 2500 hágæða hótelíbúðir.

Landið er gríðarstórt eða tveir ferkílómetrar sem jafngildir byggðinni í Reykjavík innan Hringbrautar og Snorrabrautar.

Í þrjú ár hafa ekki verið gefin út byggingaleyfi vegna spillingarmála sem komu upp í Murcia héraði. Að sögn Árna Harðarsonar forstjóra Salt Investments eiga embættismenn þar í landi að hafa þegið mútur fyrir að veita byggingaleyfi og upphófust málaferli í kjölfarið. Þau mál tengjast á engan hátt íslenskum fjárfestum.

Landið er friðlýst að hluta en Árni segir menn hafa bundið vonir við að byggja á að minnsta kosti 15% landsins.

Í ofanálag hafi fasteignamarkaðurinn hrunið á Spáni síðustu mánuði og því hafi menn ákveðið að endurskoða verkefnið í ljósi breyttra markaðsaðstæðna. Gert sé ráð fyrir að framkvæmdir hefjist í fyrsta lagi eftir ár. Ekki náðist í Svein Björnsson, framkvæmdastjóra AB Capital.