Crouch: Ég varð að fara frá Liverpool

Framherjinn Peter Crouch segist hafa yfirgefið Liverpool með söknuð í hjarta en ætlar sér stóra hluti undir stjórn Harry Redknapp hjá Portsmouth.

Crouch segist hafa gert sér grein fyrir að hann fengi ekki að spila hvern einasta leik þegar hann fór til Liverpool á sínum tíma, en hann hafi einfaldlega verið orðinn þreyttur á að sitja á bekknum.

"Ég vissi að menn eins og Steven Gerrard, Fernando Torres og Jamie Carragher væru alltaf fyrstir á blað hjá Benitez knattspyrnustjóra en að hinir mennirnir í liðinu þyrftu að berjast um lausu sætin í hverri viku. Mér fannst ég standa mig þokkalega þegar ég fékk að spila en að lokum fékk ég bara allt of lítið að spila. Rafa var með sínar hugmyndir og ég mínar. Ég vil bara fá að spila því ég er að nálgast hátind ferilsins. Ég ætla ekki að standa hérna og segja að við komumst á topp fjögur, en ef eitthvað lið á möguleika á því - er það Portsmouth" sagði Crouch í samtali við Sun.

Harry Redknapp þekkir manna best til Crouch, því þegar hann gekk frá 11 milljón punda kaupum á framherjanum á dögunum var það í þriðja skipti sem hann kaupir hann.

Redknapp fékk Crouch til Portsmouth á sínum tíma og keypti hann svo síðar til Southampton þegar hann tók við þar sem stjóri.

"Crouch var orðinn leiður á að fá ekki að spila þó hann væri hjá stórliði eins og Liverpool. Ég fékk hann til Portsmouth árið 2001 og svo keypti ég hann til Southampton. Ári eftir það var hann kominn í enska landsliðið. Hann er enn betri leikmaður núna og sjálfstraust hans er í botni," sagði Redknapp.

Crouch er nú að leita sér að húsnæði í Portsmouth, en það eru ekki góð tíðindi fyrir framherjann John Utaka, því hann leigir íbúð sem Crouch á í borginni frá því hann lék með liðinu.

"Ætli ég verði ekki að sparka honum út - hann er á leiðinni á götuna," sagði Crouch í léttum tón.