Seltirningar vilja að aðalskipulag verði endurskoðað

Nokkrir ósáttir íbúar á Seltjarnarnesi krefjast þess að bæjaryfirvöld taki aðalskipulag bæjarins til endurskoðunar. Þetta kemur fram í bréfi sem borið var til allra íbúa sveitarfélagsins í dag.

Til stendur að reisa íbúðarbyggð á iðnaðarsvæðinu við Bygggarða, samkvæmt Aðalskipulagi Seltjarnarness 2006-2024. Svæðið sem afmarkað er fyrir hina nýju íbúðarbyggð er um 3 hektarar að stærð. Á því svæði er gert ráð fyrir 180 íbúðum sem geti rúmað um 600 íbúa. Hámarksnýtingarhlutfall á svæðinu er 0,8.

Sigurveig Alexandersdóttir er ein þeirra sem stendur að kröfunni. Hún segist vilja að hámarksnýtingarhlutfall á svæðinu verði lækkað þannig að hlutfallið verði í einhverju samræmi við nærliggjandi íbúðasvæði. "Ef af þessu verður eins og þetta lítur út núna verður það algert skipulagsslys," segir Sigurveig. "Þarna er mikið útivistarsvæði og mikið fuglalíf. Þetta myndi allt eyðileggjast," segir hún. Hún segist þó ekki vera mótfallin byggð, en það verði að vera lágreist byggð og ekki gert ráð fyrir svo miklum fjölda íbúða.

Sigurveig segist hafa fengið góð viðbrögð við bréfinu. Það sé mikill vilji fyrir því að vernda þá náttúruperlu sem þarna sé.