Fimm í gæsluvarðhald vegna árásar á lögreglumenn

Héraðsdómur Reykjavíkur féllst í dag á gæsluvarðhaldsúrskurð yfir fimm mönnum sem grunaðir eru um fólskulega árás á lögreglumenn í miðborginni í nótt. Verða þeir í gæsluvarðhaldi fram á þriðjudag.

Fjórir óeinkennisklæddir lögreglumennirnir voru við fíkniefnaeftirlit þegar fimm menn réðust á þá og létu höggin og spörkin dynja á þeim þannig að flytja þurfti tvo lögreglumannanna á slysadeild með sjúkrabílum. Hinir tveir þurftu einnig að leita lækninga. Einn lögreglumannanna fékk þungt höfuðhögg en að sögn Friðriks Smára Björgvinssonar, yfirlögregluþjóns hjá lögreglunni á höfuðborgarsvæðinu, hefur hann verið útskrifaður nú. Hann verður þó frá vinnu í einhvern tíma.

Þrír árásarmannanna voru handteknir í nótt ásamt stúlku en stúlkunni var síðar sleppt. Leitað var að hinum mönnunum tveimur og fundust þeir nú í eftirmiðdaginn að sögn Friðriks. Allir eru mennirnir af erlendu bergi brotnir. Sem fyrr segir hafa tveir þeirra þegar verið úrskurðaðir í gæsluvarðhald og unnið er í máli hins þriðja sem handtekinn var í nótt.

Friðrik segir að rannsókn málsins haldi áfram en eftir á að klára yfirheyrslur yfir mönnunum tveimur sem handteknir voru í dag. Einnig verður farið fram á gæsluvarðhald yfir þeim. Friðrik segir mennina ekki hafa gefið neinar skýringar á háttalagi sínu.