Lúðvík í mál gegn hálfbræðrum sínum

Í dag var þingfest í Héraðsdómi Reykjavíkur mál Lúðvíks Gizurarsonar hæstaréttarlögmanns gegn hálfbræðrum sínum, þeim Sigurði og Bergsteini Gizurarsonum.

Málið snýst um arf eftir systur þeirra og hálfsystur Lúvíks, sem lést þegar barnsfaðernismál Lúðvíks var enn til meðferðar. Í því fékk Lúðvík úr því skorið að hann væri ekki samfeðra systkinum sínum heldur sonur Hermanns Jónassonar, fyrrverandi forsætisráðherra.

Þegar dánarbúi hálfsystur Lúðvíks var skipt fékk hann aðeins helminginn af því sem Sigurður annars vegar og Bergsteinn hins vegar fengu í sinn hlut, á þeim forsendum að hann væri ekki albróðir hinna látnu.

Við þetta sættir Lúðvík sig ekki og hefur því höfðað mál á hendur bræðrum sínum. Dögg Pálsdóttir flytur mál Lúðvíks en hún flutti einnig barnsfaðernismál hans á sínum tíma.