Ómögulegt að staðfesta bílaíkveikju í Vogum

Þrír bandarískir sérfræðingar, sem dvöldu hér á landi við að rannsaka vettvang og bíla í bílabrunanum í Vogum í byrjun desember, hafa lokið störfum. Heimildir Vísis herma að bílarnir hafi verið svo illa brunnir að engin leið hafi verið að finna út hvort um íkveikju var að ræða.

Tíu bílar í eigu athafnamannsins Ragnars Magnússonar brunnu til kaldra kola í Vogum á Vatnsleysuströnd þann 8. desember síðastliðinn og komust strax þær sögur á kreik að um íkveikju hafi verið ræða. Samkvæmt heimildum Vísis gátu bandarísku sérfræðingarnir ekki fundið neitt í brunarústunum sem færði þeim heim sanninn um að kveikt hafi verið í bílunum af ásettu ráði.

Lögreglan á Suðurnesjum vildi ekkert tjá sig um málið þegar Vísir leitaði eftir því í dag.